Irani ka thënë se do të presë një përgjigje zyrtare nga negociatorët amerikanë pasi Presidenti Donald Trump hodhi poshtë një propozim për të rihapur Ngushticën e Hormuzit për anijet tregtare brenda shtatë ditësh.
Në një postim në Telegram, Ministri i Jashtëm iranian Abbas Araghchi pranoi refuzimin e Trump, por akuzoi presidentin se më parë kishte bërë deklarata kontradiktore.
Më parë, Trump u tha gazetarëve në Shtëpinë e Bardhë se propozimi i Teheranit nuk ishte “i pranueshëm” dhe se ata donin të bënin një marrëveshje për të hapur menjëherë ngushticën sepse “po humbasin shumë keq”, shkruan BBC, transmeton KosovaPress.
Të premten në OKB, Araghchi u tha gazetarëve se një marrëveshje mund të arrihet nëse “plotësohen kushtet e nevojshme” midis dy vendeve.
Araghchi tha se kushtet për hapjen e ngushticës ishin të njëjtat që ishin përfshirë në një memorandum mirëkuptimi midis SHBA-së dhe Iranit që u nënshkrua në qershor.
Irani tha se kishte ngritur çështjen e rihapjes së ngushticës dhe përfundimit të armiqësive gjatë negociatave në margjinat e Asamblesë së Përgjithshme të OKB-së në Nju Jork javën e kaluar.
Rruga ujore jetësore përmes së cilës rrjedh zakonisht rreth një e pesta e furnizimit botëror me gaz dhe naftë është mbyllur në mënyrë efektive që nga shpërthimi i luftës në shkurt.
“Po e hedh poshtë marrëveshjen e tyre”, tha Trump të shtunën, duke shtuar se SHBA-të tashmë kishin “kontroll të plotë” të ngushticës, me “sasi të mëdha nafte” që kalonin nëpër të.
Araghchi shkroi në Telegram se Trump “ka bërë shumë deklarata të mira, si dhe shumë deklarata kontradiktore, të cilat për fat të keq i dëgjojmë shpesh”.
“Po presim që ndërmjetësuesit të na përcjellin pikëpamjet përfundimtare dhe ne do të marrim një vendim bazuar në to”, tha Araghchi.
Omani, i cili ka vepruar si ndërmjetës midis SHBA-së dhe Iranit, u bëri thirrje të gjitha palëve të vazhdojnë dialogun e hapur për të zgjidhur krizën.
Ministri i Jashtëm i Omanit, Sayyid Badr bin Hamad bin Hamood Albusaidi, i tha Debatit të Përgjithshëm të OKB-së se “të gjitha palët” duhet të bashkëpunojnë me Omanin në përpjekjet për të mbrojtur lundrimin në rrugën ujore strategjike.
Refuzimi i propozimit të Iranit nga Trump u mbështet nga ambasadori i SHBA-së në NATO, Matthew Whitaker.
Duke folur për Fox News të shtunën, Whitaker tha se Irani kishte ofruar “gjysmëmasa” dhe “marrëveshje iluzore për t’u dukur mirë në skenën botërore”.
“Presidenti Trump ka të drejtë ta refuzojë atë,” tha ai.
Ndërkohë, Sekretari i Thesarit, Scott Bessent, tha të shtunën se presioni ekonomik nga SHBA-të po ndikonte negativisht në Teheran.
Burimi: botasot.info
