Ibrahimi: Është mjerim të flasim për gjendjen e shkollave në Dibër kur e dimë se ajo botës shqiptare i ka dhënë arsimtar!

Kryetari i Alternativës dhe njëri prej liderëve të VLEN, Zeqirija Ibrahimi, ka marr pjesë në hapjen e shtabit të VLEN në Dibër si dhe promovimit të kandidatit për kryetar të komunës së Dibrës, Fisnik Mela.

Ibrahimi ka folur për rrolin e dibranëve në arsimimin e shqiptarëve në të gjitha trojet shqiptare.

“Për të gjithë botën shqiptare, Dibra është një epiqendër që gjithnjë ka rrezatuar intelektual, veprimtar, aktivist, klerik, biznesmen, afarist të suksesshëm. Së paku arsimi shqip, në të gjitha vendet, të Maqedonisë, të Kosovës, po edhe të Shqipërisë, u detyrohet dibranëve. Thuajse nuk ka asnjë shkollë të vendbanimeve shqiptare që nuk ka pasur një arsimtar të Dibrës”, nënvizoi Ibrahimi.

Ibrahimi ka theksuar se është mjerim që saherë që vijmë në Dibër të flasim për gjendjen e shkollave.

“Kur vijmë këtu dhe akoma duhet të flasim, a janë rrugët e asfaltuara, a ka ujë të pijshëm gjithkund, a është rregulluar infrastruktura lokale, a e kemi të rregulluar kanalizimin, a ka drita gjithkund, si është gjendja e shkollave, vërtetë është mjaftë e ulët që për një Dibër dikush që e ka qeverisur mbi dy dekada akoma të vijë të flas për ato tema ” , nënvizoi Ibrahimi.