Njëri nga liderët e koalicionit VLEN, Zeqirija Ibrahimi, ka reaguar pas shpërndarjes së titullit “Doctor Honoris Causa” nga një universitet në Tiranë për kreun e BDI-së, Ali Ahmeti i cili vetëm pak ditë më parë kishte ofenduar shqiptarët e opozitës duke i quajtur “zagarë”.
Ibrahimi shprehu indinjatën e tij duke theksuar se institucionet akademike nuk duhet të shërbejnë si lavatriçe për gjynahet e politikanëve. “Disertacionin e doktoratës e kam mbrojtur qysh më 2010, por përveçse në punën time në Institut, e kam mërzi kur në opinion më përmendet ky titull. Andaj më vjen keq për institucionet arsimore-shkencore që tregtojnë me tituj shkencorë e honorofikë për të larë mëkatet e politikanëve të pakujdesshëm”, shkroi ai.
Ai shtoi se, nëse universiteti do të kishte pasur dinjitet, së paku do ta kishte shtyrë ceremoninë, për të mos u interpretuar si shërbim ndaj një politike ofenduese ndaj shqiptarëve. “Personi që e ka pranuar këtë titull, edhe pse kurrë me asgjë nuk na ka bindur se meriton mirënjohje të tillë, veç e mashtron veten se ky titull ia fshin edhe ofendimin që ua bëri shqiptarëve”, ka theksuar Ibrahimi.
Duke përmbyllur reagimin, Ibrahimi kujtoi një thënie të shkrimtarit francez Honoré de Balzac: “Ata që i duan dekoratat, rëndom nuk i meritojnë, ndërsa ata që i meritojnë, rëndom nuk i duan”.
Burimi: alfax.mk
