Humbi jetën teksa po luante në kalçeto, përcillet për në banesën e fundit 42-vjeçari në Vlorë

Dy ditë pas ngjarjes së rëndë të ndodhur në një kalçeto në fshatin Novosel, ku humbi jetën një 42-vjeçar, sot është zhvilluar ceremonia mortore e të riut Besfort Ruanaj.

Ngjarja ndodhi në ambientet e kalçetos, ku sipas administratorit të saj, i cili ka folur për Top Channel, goditja me top në kraharor e 42-vjeçarit ka qenë e lehtë dhe ai nuk dyshon se vdekja ka ardhur si pasojë e kësaj goditjeje. Ndërkohë, në këtë kalçeto i riu kishte shkuar për herë të parë për të luajtur, po ashtu edhe shokët e tij nuk vinin shpesh për të luajtur në kalçeton e fshatit Novosel.

Pasi ai ra në tokë, ishte e pamundur të jepeshin ndihmat e para, por sipas mjekëve, kur mbërriti ambulanca, ai ishte pa jetë. Trupi i tij është dërguar në morgun e spitalit të Vlorës. Ndërkohë, pritet edhe përgjigjja e analizave të autopsisë për të verifikuar shkakun e vdekjes.

Pra, i riu ka humbur jetën në vendngjarje, ndërsa dyshohet se shkaku i vdekjes ka qenë arresti kardiak. Nga ana tjetër, burime nga Spitali i Vlorës bëjnë me dije se pritet ekspertiza mjeko-ligjore, e cila nga verifikimet e para lë të kuptohet se vdekja e 42-vjeçarit mund të ketë ardhur pikërisht nga arresti kardiak.

Sot, rreth orës 11:00, në Drashovicë të qytetit të Vlorës është kryer edhe ceremonia mortore, ku i riu është përcjellë për në banesën e fundit nga të afërmit, miqtë dhe familjarët e tij.

42-vjeçari prej vitesh jetonte dhe punonte si emigrant në Gjermani.