Hong Kongu e ka rritur parashikimin e rritjes së PBB-së reale për vitin 2026 në 4,8 për qind, nga një nivel i mëparshëm që varionte midis 3,5 dhe 4,5 për qind. Ky përmirësim mbështetet në ecurinë pozitive ekonomike gjatë tre tremujorëve të parë, si dhe në vrullin e pritshëm të rritjes për tremujorin e fundit, shkruan “Xinhua”.
Hong Kongu/Foto nga VCG
Qeveria e Rajonit të Posaçëm Administrativ të Hong Kongut (HKSAR) njoftoi se në total për tre tremujorët e parë, PBB-ja reale është rritur me 5,1 për qind krahasuar me një vit më parë, ritmi më i shpejtë i regjistruar në pesë vitet e fundit.
Të dhënat zyrtare tregojnë se rritja e PBB-së reale të Hong Kongut u përshpejtua në 5,2 për qind në tremujorin e tretë (krahasuar me të njëjtën periudhë të vitit të kaluar), e nxitur nga zgjerimi më i shpejtë i tregtisë së jashtme dhe kërkesa e qëndrueshme e brendshme.
Gjatë periudhës korrik-shtator, eksportet e mallrave nga Hong Kongu shënuan një rritje prej 30,3 për qind në terma realë krahasuar me një vit më parë, ndërsa eksportet e shërbimeve u rritën me 4,3 për qind.
Një zyrtar i qeverisë së HKSAR-it deklaroi se ekonomia e Hong Kongut pritet të ketë një ecuri të fortë për të gjithë vitin, duke theksuar se eksportet e shërbimeve dhe kërkesa e brendshme janë faktorët kryesorë që nxisin këtë rritje.
Burimi:TV21
