Një raketë e lëshuar nga Libani goditi një stacion satelitor thellë brenda territorit të Izraelit, raportuan sot mediat izraelite.
Televizioni “N12” publikoi pamje dramatike nga një kamerë makine që tregojnë momentin e goditjes gjatë sulmit
Sipas raportimeve, u godit një stacion që i përket operatorit europian të satelitëve SES, i vendosur në zonën Emek Haela, pranë qytetit Beit Shemesh.
Milicia libaneze Hezbollah, e mbështetur nga Irani, mori përgjegjësinë për sulmin dhe pretendoi se objekti i goditur i përkiste një njësie kibernetike të ushtrisë izraelite.
Megjithatë, mediet izraelite e përshkruan atë si një objekt civil dhe komercial.
Këto pretendime nuk mund të verifikoheshin në mënyrë të pavarur.
Stacioni satelitor ndodhet rreth 160 kilometra nga kufiri me Libanin, duke e bërë sulmin një goditje të pazakontë precize thellë brenda territorit izraelit.
Sipas gazetës “Times of Israel”, shpërthimi shkaktoi dëme në infrastrukturën e objektit dhe plagosi dy persona.
Ushtria izraelite tha se një “dështim i izoluar” bëri që raketa të godiste objektivin pa u interceptuar dhe pa u aktivizuar sirenat paralajmëruese në zonë.
Gazeta ekonomike izraelite “Calcalist” raportoi se raketa ishte e tipit “Fateh-110”, një raketë tokë-tokë me drejtim preciz e prodhuar në Iran dhe e pajisur me një kokë të rëndë shpërthyese, e projektuar për të goditur infrastrukturë strategjike.
Burimi: botasot.info
