Haradinaj nga Rahoveci: Latifi është njeriu i punës,meriton edhe një mandat

Xërxa dhe Ratkoci i Rahovecit ishin dy fshatrat ku sot u përqendruan drejtuesit e AAK-së. Kryetari i kësaj partie, Ramush Haradinaj, tha se Rahoveci meriton të vazhdojë të drejtohet nga Smajl Latifi, kandidat i kësaj partie për kryetar të komunës. Duke kërkuar votën edhe për një mandat, Latifi premtoi vazhdimin e realizimit të projekteve të tjera për bashkëqytetarët e tij.

Kandidati i Aleancës për Ardhmërinë e Kosovës për kryetar të komunës së Rahovecit, Smajl Latifi, i shoqëruar nga kryetari i kësaj partie, Ramush Haradinaj, takoi banorët e fshatit Xërxë. Në kuadër të fushatës elektorale për zgjedhjet e balotazhit të së dielës, ata kërkuan edhe një herë mbështetjen e tyre.

Kryetari i AAK-së, Ramush Haradinaj, tha se kandidati i kësaj partie për kryetar të Rahovecit është vlerë që ia do të mirën komunës dhe banorëve të saj. Ai theksoi se Latifi është njeri i punës dhe është dëshmuar edhe gjatë mandatit të kaluar se nuk kursen asgjë nga vetja për të mirën e qytetarëve.

Haradinaj kërkoi nga rahovecianët mobilizim në ditën e zgjedhjeve, në mënyrë që Latifit t’i jepet mundësia për realizimin e projekteve të tjera për këtë komunë. Ndërkohë, Latifi tha se Rahoveci meriton zhvillimin dhe angazhimin e tij, sikurse edhe në mandatin e kaluar.

Latifi beson se vitet që ka qeverisur me Rahovecin do t’i sigurojnë atij fitoren, pasi, sipas tij, me të gjitha mundësitë dhe kapacitetet janë munduar t’i mbështesin qytetarët e të gjitha kategorive.

Smajl Latifi komentoi edhe kundërkandidatin e tij, me të cilin do të përballet me votë më 9 nëntor.

Smajl Latifi dhe Ramush Haradinaj e vazhduan fushatën elektorale edhe në fshatin Ratkoc. Kandidati i AAK-së për kryetar të Rahovecit ka për kundërkandidat atë të LVV-së.