Ish ministri i Financave, Xhevdet Hajredini, njëherësh dhe njohës i rrethanave politike, ka reaguar me ironi ndaj analistit politik Sefer Selimi, pas shkrimit kritik të këtij të fundit për koalocionin qeverisës VLEN.
Reagimi i Hajredinit vjen si kundërpërgjigje direkte ndaj pyetjes së ngritur nga Selimi, i cili, duke komentuar krijimin dhe funksionimin e VLEN-it si një subjekt politik, kishte shtruar dilemën: “Po t’ia heqësh BDI-në dhe VMRO-në, ç’kuptim ka VLEN?”
Duke e kthyer pyetjen në drejtim të BDI-së, Hajredini shkruan shkurt e prerë: “Po t’ia heqësh paratë e Jahoskit, Mijallkovit dhe TELEKOM-it, ç’kuptim ka BDI?”
Me këtë reagim, Hajredini nënkupton se debati për kuptimin politik të subjekteve nuk mund të bëhet pa u përballur me burimet reale të fuqisë dhe ndikimit të tyre, duke aluduar në lidhje financiare dhe struktura të interesit që, sipas tij, e kanë mbajtur BDI-në relevante ndër vite.
Ndryshe, në statusin e tij në facebook, Sefer Selimi e përshkruan VLEN-in si një “konglomerat interesash individuale dhe kolektive”, një bashkim pa identitet ideologjik të qartë dhe pa perspektivë afatgjate, duke e cilësuar madje si një “Frankenstein politik të importuar nga jashtë”.
