Gjykata e Apelit ua ka rritur dënimet grupit nga Velesi, i cili gjatë një viti, në disa raste, abuzoi seksualisht një të mitur. Televizioni Tellma raporton se bëhet fjalë për disa nga djemtë që në vitin 2016 merreshin me përhapjen e lajmeve të rreme për Donald Trump, transmeton Portalb.mk.
Pjesa më e madhe e të dënuarve janë pikërisht të ashtuquajturit “fëmijët e Trumpit” nga Velesi. Ata menjëherë pretenduan se arrestimi i tyre ishte hakmarrje për shkak se kishin punuar për Trumpin dhe kishin fituar shumë para. Akuzuan se u ishte kërkuar ryshfet si nga policia ashtu edhe nga qarqe gjyqësore dhe prokuroriale, në mënyrë që të mos akuzoheshin dhe dënoheshin, si dhe për të mos përfunduar në paraburgim. Disa herë paralajmëruan se do të flisnin publikisht, por nuk e bënë kurrë këtë.
Sipas Prokurorisë, pretendimet për “Trump”, “Republikanë” dhe të ngjashme janë përpjekje për të devijuar vëmendjen nga faktet.
I akuzuari kryesor, Stefan Dimovski, është në arrati. Ai ka ikur nga arresti shtëpiak që i ishte caktuar nga Gjykata Penale gjatë shpalljes së aktgjykimit, një javë para se t’i rritej dënimi.
Më 7 prill, Ministria e Punëve të Brendshme shpalli për të vetëm një fletarrest qendror, por jo ndërkombëtar. Në burg tashmë ndodhet Tino Ilievski, i cili ishte kapur jashtë pavarësisht se i ishte caktuar arrest shtëpiak.
Për të tjerët nuk ka informacion nëse janë paraqitur për vuajtjen e dënimit.
Burimi: lajmpress.org
