Gripi në qarkullim, 188 raste dhe dy viktima

26

Shkup, 26 tetor – Gripi ka mbërritur zyrtarisht dhe po përhapet me ritme të shpejta. Sipas të dhënave më të fundit nga Instituti i Shëndetit Publik, që nga fillimi i sezonit 2025/2026 janë regjistruar 188 raste të gripit në vend, që paraqet rritje prej 77 për qind krahasuar me të njëjtën periudhë të vitit të kaluar dhe 36 për qind më shumë se mesatarja e 14 sezoneve të fundit.

Numri më i madh i të prekurve është në Gostivar, ku deri më tani janë raportuar 79 raste, ndërsa incidenca më e lartë është regjistruar në Makedonski Brod. Instituti ka konfirmuar gjithashtu dy viktima të lidhura me gripin.

Paralelisht me rritjen e përgjithshme të rasteve, po vërehet edhe përhapje e përshpejtuar në baza javore. Nga 13 deri më 19 tetor janë raportuar 83 raste të sëmundjeve të ngjashme me gripin, që është 66 për qind më shumë se në të njëjtën periudhë të vitit të kaluar dhe 5 për qind më shumë se një javë më parë.

Më të prekurat aktualisht janë komunat Gostivar dhe Tetovë, me 30 dhe 12 raste të reja, përkatësisht, ndërsa pasojnë Kumanova, Prilepi, Makedonski Brod, Strumica, Negotina dhe Radovishi.

Shumica e të prekurve janë persona të moshës 15 deri 64 vjeç, grup që, sipas epidemiologëve, është më i ekspozuari për shkak të lëvizshmërisë dhe kontakteve të shumta.

Megjithatë, niveli i incidencës mbetet ende ndërsezonal — 4,5 të sëmurë për 100.000 banorë — që do të thotë se sezoni i gripit ende nuk është shpallur zyrtarisht, por rritja e rasteve është një sinjal i qartë se virusi ka filluar të qarkullojë aktivisht.

Autoritetet shëndetësore theksojnë se parandalimi fillon me vaksinimin. Për sezonin 2025/2026, Ministria e Shëndetësisë ka siguruar rreth 80.000 doza falas të vaksinës katërvalente për grupet në rrezik — personat mbi 65 vjeç, të sëmurët kronikë, gratë shtatzëna, fëmijët nga 6 muaj deri në 5 vjeç dhe punonjësit shëndetësorë.
Vaksinat shpërndahen përmes qendrave të shëndetit publik dhe platformës elektronike vakcinacija.mk.

Deri në mesin e tetorit janë vaksinuar 13.273 persona nga kategoritë prioritare, ndërsa për qytetarët jashtë grupeve të rrezikut janë siguruar edhe 2.400 doza komerciale.

Vetëm në ditët e para të fushatës së imunizimit, dhjetëra mijëra qytetarë kanë bërë prenotime, gjë që autoritetet e interpretojnë si rritje të ndërgjegjësimit pas përvojës me pandeminë.