​Gjykata shpall fajtor udhëheqësin e një sekti në Kenia

Një gjykatë në Kenia shpalli sot fajtor udhëheqësin e sektit, Paul Mackenzie, dhe rreth tridhjetë nga ndjekësit e tij për vrasjen e 191 personave, përfshirë 190 fëmijë.

Mackenzie dhe të dënuarit e tjerë do të marrin dënimin më 6 nëntor. Ish-predikuesi u arrestua në vitin 2023 pas një informacioni të dhënë policisë; pak javë më vonë, hetuesit filluan të gjenin trupa në varre të cekëta në pyllin Shakahola, pranë bregdetit në Kenian juglindore.

Sipas prokurorisë, Mackenzie, përmes organizatës së tij “Good News International Church”, krijoi një sekt që predikonte fundin e afërt të botës. Ai u urdhëroi ndjekësve të tij që të linin veten dhe fëmijët e tyre të vdisnin nga uria, me qëllim që të arrinin në parajsë para fundit të botës.

Mackenzie i ka mohuar akuzat për vrasje, duke pretenduar se nuk ka detyruar askënd të vdesë nga uria. Gjykata nuk e pranoi mbrojtjen e tij.

Deri më tani, në pyllin Shakahola janë gjetur më shumë se 400 trupa. Shumë nga mbetjet njerëzore ishin në një gjendje të avancuar dekompozimi, ndaj janë identifikuar vetëm 26 viktima. Vendimi i sotëm lidhet me vdekjen e 191 personave, ndërsa rrethanat e vdekjes së viktimave të tjera janë ende nën hetim.

Sipas personave të njohur me veprimtarinë e sektit, Mackenzie e organizoi urinë masive në tri faza. Fëmijët duhej të vdisnin të parët, pastaj gratë dhe të rinjtë, dhe së fundmi burrat e mbetur. Mackenzie, i cili kishte punuar si shofer taksie para se të bëhej predikues, u ndalonte ndjekësve të tij t’i dërgonin fëmijët në shkollë ose në spital kur sëmureshin.

Sipas dëshmive të ish-anëtarëve të sektit, ai i quante shkollat dhe spitalet institucione satanike. Anëtarët e sektit jetonin në strehimore të improvizuara, të ndërtuara me fletë plastike dhe kashtë. Mackenzie e ndau zonën ku jetonin në pjesë me emra biblikë, si Jerusalemi dhe Judea.

Detajet e para rreth vuajtjeve të ndjekësve dolën në dritë në mesin e marsit të vitit 2023. Një banor vendas njoftoi policinë se vëllai dhe kunata e tij, me urdhër të Mackenzie, i kishin lënë fëmijët e tyre të vdisnin nga uria. Më pas, Mackenzie u arrestua, por u lirua me kusht.

Sipas familjarëve të viktimave, pas lirimit të tij, ai e ndryshoi datën kur pretendonte se do të ndodhte fundi i botës, duke e caktuar atë më herët sesa kishte thënë më parë. Policia e arrestoi sërish në prill të vitit 2023. Më pas, filloi një kërkim më i gjerë në pyllin Shakahola dhe gërmimi i varreve masive.

Mackenzie përballet me akuza shtesë që lidhen me vdekjen e ndjekësve të tij, përfshirë vepra penale të lidhura me terrorizmin. Ai i mohon të gjitha këto akuza.

Ndryshe, ky është një nga rastet më të rënda të vdekjeve masive që lidhen me sekte fetare në historinë e fundit.