Gjykata rikthen në detyrë Sekretarin e Përgjithshëm të Bashkisë Tiranë,Alban Dokushi

Gjykata Administrative ka vendosur të rikthejë Alban Dokushin në detyrën e Sekretarit të Përgjithshëm të Bashkisë Tiranë. Dokushi u shkarkua nga detyra pas arrestimit të Erion Veliajt, me urdhër të kryebashkiakes së komanduar, Anuela Ristani.

Administrativja e shpalli absolutisht të pavlefshëm shkarkimin. Sipas gjykatës, shkarkimi është kryer në kundërshtim flagrant me ligjin, duke përbërë një shkelje të rëndë të standardeve ligjore dhe procedurale.

“Pas vendimit të Gjykatës Kushtetuese për rikthimin në detyrë të drejtuesit politik të zgjedhur të Bashkisë Tiranë, z. Erion Veliaj, vendimi i Gjykatës Administrative rikthen gjithashtu në detyrë edhe drejtuesin e administratës së Bashkisë. Në këtë këndvështrim, gjykatat kanë korrigjuar dhe prapësuar shkeljet e rënda ligjore, të kryera në përpjekje për largimin në kundërshtim me ligjin të drejtuesve politikë dhe administrativë të Bashkisë Tiranë”, deklaroi Dokushi pas vendimit të gjykatës.