Refuzohet kërkesa për rekurs nga ana e Gjykatës së Lartë për Zambak Gjonin dhe Arnold Rrokajn, të cilët dyshohet se janë pjesë e një grupi kriminal që “hakeroi” adresat elektronike (e-mail) të disa prokurorëve të SPAK. Të dy, dhe ish-zyrtarë në sistemin e burgjeve dhe në Inspektoratin e Mbrojtjes së Territorit (IMT), ndodhen aktualisht në paraburgim.
Nga të dhënat zyrtare, sulmi informatik është kryer më 12 mars, ndërsa SPAK reagoi disa ditë më vonë përmes një deklarate ku saktësonte se autorët kishin arritur të hynin në adresat e emailit të disa prokurorëve. Megjithatë, nuk është konstatuar asnjë ndërhyrje në sistemin e brendshëm të sigurisë dhe as rrjedhje të materialeve hetimore.
Brenda 24 orëve nga momenti i ndërhyrjes, SPAK realizoi arrestimin e dy të dyshuarve dhe konfiskoi pajisjet elektronike të përdorura për kryerjen e sulmit, si dhe skedarët e shkarkuar nga adresat e synuara.
Hetimet vijojnë, ndërsa organet e drejtësisë po përpiqen të identifikojnë persona të tjerë të përfshirë. Deri tani, dyshohet se dokumentet e përfituara janë shpërndarë tek të tretë, mes të cilëve dy gazetarë, si dhe ish-drejtori i Përgjithshëm i Burgjeve, Agim Ismaili, dhe Dritan Palnikaj, aktualisht sekretar i Përgjithshëm në Ministrinë e Bujqësisë./tvklan.al
Burimi: opinion.al
