Gjermania njoftoi se do t’i ofrojë Ukrainës dy sisteme shtesë të mbrojtjes ajrore Patriot në ditët në vijim dhe disa të tjera në muajt në vijim, pasi Pentagoni ra dakord të rimbushë shpejt rezervat e Berlinit.
Deklarata, e lëshuar nga Ministria e Mbrojtjes e Gjermanisë, tha gjithashtu se Gjermania do të paguante për sistemet e reja Patriot të ofruara nga SHBA-të.
“Parakushti ishte që prodhuesi amerikan të dorëzonte sisteme të reja Patriot sa më shpejt të ishte e mundur në këmbim, në mënyrë që ne të mund të vazhdonim të përmbushnim detyrimet tona ndaj NATO-s”, tha në një deklaratë ministri gjerman i Mbrojtjes, Boris Pistorius. “Ky angazhim nga ana e SHBA-së është marrë.”
Gjermania i ka siguruar Ukrainës tre raketa Patriot që nga pushtimi i Rusisë në vitin 2022 dhe ngurronte të dërgonte më shumë derisa të sigurohej që sistemet do të rimbusheshin nga SHBA-ja.
Por sipas një plani të ri të zbuluar nga Presidenti Donald Trump muajin e kaluar, vendet evropiane ranë dakord të transferonin armë në Ukrainë, ndërsa blinin armë të reja nga SHBA-ja për të mbushur rezervat e tyre.
Plani, i cili do ta shihte Evropën të mbante mbi vete një pjesë më të madhe të barrës në furnizimin e Ukrainës, ka qenë në diskutim që kur Trump fitoi zgjedhjet e vitit të kaluar dhe zyrtarët evropianë filluan shpejt të diskutonin mbi mënyrat për të mbështetur dërgesat e armëve amerikane në Ukrainë nën një udhëheqës i cili ishte zotuar të tërhiqte mbështetjen amerikane, raportoi CNN.
Burimi: botasot.info
