2
Ankona, 4 dhjetor – Nazif Muslija, 50 vjeç, me origjinë nga Maqedonia e Veriut, i cili ishte në kërkim për vrasjen e bashkëshortes së tij Sadjide Muslija, 49 vjeçe, është gjetur i gjallë, por i plagosur rëndë, në zonën e Matelica-s pranë Ankonës. Ai ishte në arrati për më shumë se 24 orë.
Ekipet mjekësore të emergjencës po punojnë për ta stabilizuar. Automjeti i tij, një Smart e bardhë, u gjet i braktisur në një zonë të vështirë terreni, ndërsa ai vetë u gjet i shtrirë në tokë.
Gjatë hetimeve të ditës së sotme, karabinierët sekuestruan një tub hekuri në banesën në Pianello Vallesina, Monte Roberto, ku një ditë më parë u gjet e vrarë gruaja. Mjeti do të analizohet për të parë nëse lidhet me krimin.
Prokuroria e Ankonës kishte lëshuar urdhër ndalimi dhe kërkim ndërkombëtar ndaj Muslijës për vrasje. Dëshmitarë të ndryshëm e kishin parë atë të largohej me makinën e tij nga banesa ku ndodhi ngjarja.
Hetimet vazhdojnë, ndërsa autopsia pritet të caktohet në ditët në vijim.
Burimi: zhurnal.mk
