Kryeministrja italiane Georgia Meloni dhe motra e saj Arianna janë indinjuar pas publikimit në disa faqe web të fotove të tyre dhe të grave të tjera, të cilat nuk e dinë që po fotografohen dhe komentohen me fyerje seksiste.
Indinjata e motrave Meloni vjen pas publikimit të fotove të grave — të fotografuara pa dijeni — të shoqëruara me komente seksiste në një faqe interneti tashmë të mbyllur. Kryeministrja Giorgia Meloni deklaron: “Duhet të denoncohet”, ndërsa motra e saj, Arianna, shprehet se “ekziston një shoqëri e klikimeve që shkatërron jetët e njerëzve”.
Fotot nuk i kanë parë, por që të publikohen imazhe të grave dhe ato të viheshin në lojë me komente seksiste apo përçmuese, pa respekt për privatësinë dhe të drejtën për të mos u ngacmuar në asnjë formë — kjo është diçka e rëndë, sipas Giorgia dhe Arianna Melonit.
Të dyja, si politikane dhe si femra, janë ndër viktimat e faqes Phica.eu, e cila tashmë është mbyllur nga vetë administratorët pas indinjatës së madhe që shkaktoi në të gjitha partitë politike dhe në mbarë opinionin publik italian.
Roli i dy motrave është sigurisht i ndryshëm, ashtu si edhe karakteri, por të dyja — duke folur për Corriere della Sera — e gjykojnë plotësisht të papranueshme një fakt kaq të rëndë. Një hap përpara, drejt një gremine, që duhet ndalur para se shumë e shumë të përfundojnë brenda.
Kryeministrja Giorgia Meloni është e tërbuar nga ngjarja. Ajo mori një natë për të menduar si të reagonte, dhe tani thërret për veprim: Të reagojmë dhe të denoncojmë. Kjo, sipas saj, nuk është vetëm një e drejtë, por një detyrë dhe domosdoshmëri.
Ndërkohë, Arianna Meloni do të donte pothuajse të fiken dritat që ndriçojnë këtë spektakël të turpshëm, që bie ndesh me avancimin e grave në shoqëri.
Ajo dënon një “ves të keq” të shoqërisë së klikimeve, një botë ku njerëzit hyjnë në privatësinë e të tjerëve, i shikojnë nga vrima e çelësit, i fyejnë, i shkatërrojnë dhe minimizojnë përpjekjet dhe arritjet reale që gratë i arrijnë çdo ditë përmes punës së tyre.
Nga ana tjetër, kryeministrja Meloni flet edhe si përfaqësuese e qeverisë, duke reaguar me ashpërsinë që kërkojnë raste të tilla. Ajo thekson se kjo nuk është çështje e një individi apo e një grupi politik, por një çështje që prek gjithë shoqërinë — një botë që ajo përpiqet ta përfaqësojë dhe ta mbrojë me përgjegjësinë e postit të saj.
“Jam e neveritur nga ajo që ka ndodhur,” thotë ajo, “dhe dua të shpreh solidaritetin dhe afërsinë time me të gjitha gratë që janë fyer, ofenduar dhe cenuar në intimitetin e tyre nga administratorët e këtij forumi dhe ‘përdoruesit’ e tij.”
Meloni nënvizon se, pavarësisht se jemi në vitin 2025, ende ekzistojnë ata që e konsiderojnë normale dhe të pranueshme shkeljen e dinjitetit të një gruaje, duke e kthyer atë në objekt fyerjesh seksiste e vulgare, shpeshherë duke u fshehur pas anonimatit apo tastierës.
Top Channel
Burimi: top channel
