George Clooney, i sinqertë: Pamjet nga filmat e vjetër më bënë të ndihem i pasigurt

George Clooney ka zbuluar se është ndjerë i shqetësuar dhe emocional kur ka parë pamje të vërteta nga filmat e tij të vjetër të përdorura në filmin e ri “Jay Kelly”. Aktori fitues i Oscar-it ka folur për këtë eksperiencë gjatë premierës së filmit në Los Angeles, duke pranuar se momenti e “goditi” më shumë nga sa priste.

Duke folur për “People”, Clooney tha se paralelizmat mes filmit dhe jetës së tij reale nuk ishin aspak të lehtë për t’u përtypur. Ai rrëfeu se skena finale, ku personazhi i tij sheh një retrospektivë të karrierës në një ceremoni nderimi, ishte aq realiste sa i shkaktoi një ndjenjë të papritur nervozizmi.

Regjisori Noah Baumbach ka përdorur pamje autentike nga filmat e rinisë së aktorit një zgjedhje artistike të cilën Clooney nuk e kishte pritur. “Nuk e dija se do ta bënin,” tha ai. “Herën e parë që e xhiruan, ishte edhe hera e parë që ma treguan. Ajo pamje e parë është pikërisht ajo që shihni në film.”

Një moment që ka tërhequr vëmendje është ai ku Clooney shfaqet duke mbajtur dorën e menaxherit të tij në film, të interpretuar nga Adam Sandler. Clooney pranoi se nuk ishte pjesë e skenarit dhe ndodhi krejt natyrshëm: “U habita dhe u ndjeva pak nervoz. Është e vështirë.”

Me humor, ai shtoi: “Duhet të jesh shumë i mirë me veten për të parë një version 40-vjeçar të karrierës tënde. Nuk është e lehtë. Nuk është gjithmonë e bukur.”

Ky reflektim i Clooney-t ka bërë jehonë te fansat, të cilët e vlerësojnë për sinqeritetin dhe mënyrën se si përballet me të kaluarën e tij profesionale, një rrugëtim që e ka bërë një nga aktorët më të dashur të Hollywood-it.