Fisnik Mela, kandidati i koalicionit VLEN, ka shpallur zyrtarisht kandidaturën e tij për kryetar të Komunës së Dibrës, duke theksuar se qyteti ka nevojë për një qasje të re dhe të ndershme ndaj qytetarëve.
“Pas një periudhe të gjatë reflektimi, analize dhe konsultimesh me partnerët e koalicionit VLEN, dhe me miratimin e Kryesisë Qendrore, është vendosur që unë, Fisnik Mela, të jem kandidati për Komunën e Dibrës,” deklaroi Mela, duke theksuar se kjo është një sfidë që e pranon me nderim të lartë.
Ai shtoi se Dibra ka një potencial të jashtëzakonshëm dhe kërkon një vizion të qartë për zhvillim: “Ka ardhur koha për një vizion të ri, për një qasje të ndershme, të përgjegjshme dhe me përkushtim të vërtetë ndaj qytetarit. Unë nuk vij për premtime boshe, por për të dëshmuar se me punë të ndershme, mund të rikthejmë shpresën.”
Mela theksoi se drejtësia, sinqeriteti, meritokracia dhe përkushtimi do të jenë katër shtyllat që do të udhëheqin punën e tij dhe falënderoi liderët e koalicionit VLEN, në veçanti kryetarin e Alternativës, Zeqirija Ibrahimi, për mbështetjen.
“Dibra ndërtohet nga Dibranët – dhe bashkë, do ta bëjmë këtë,” u shpreh kandidati i VLEN, duke ftuar qytetarët të kontribuojnë në një fushatë “dinjitoze, transparente dhe përbashkuese.”
Burimi: lajme24.mk
