Fetai reagon ashpër ndaj shpifjeve të BDI-së: Janë tërbuar si qen të egër, vazhdoni fundërrina!

Zëvendëskryeministri dhe njëri nga eksponentët kryesorë të VLEN-it, Arben Fetai, ka reaguar me tone të ashpra ndaj, siç i quan ai, “shpifjeve të ulëta” që vijnë nga eksponentë të BDI-së.

Në një status në rrjetet sociale, Fetai i ka cilësuar “ushtarët e Zllatan Grubit” si “të shkatërruar moralisht, të dërmuar politikisht dhe të dëshpëruar nga humbja e çdo pushteti”, duke theksuar se janë duke fabrikuar “gënjeshtra të neveritshme” dhe duke manipuluar dizajnin e VLEN-it për t’i atribuuar atij fjalë që, sipas tij, as nuk i ka thënë, e as menduar ndonjëherë. “Këto janë trillime të poshtra të një partie të kalbur, që për 22 vjet e ndërtoi pushtetin mbi gënjeshtra, vrasje dhe krim. Sulmet e tyre të fëlliqura nuk janë gjë tjetër veçse dëshmia që ne jemi në rrugën e duhur. Po i çrrënjosim nga shteti, po ua shkatërrojmë pazaret e pisëta, po ua çmontojmë sistemin e tyre kriminal”, ka theksuar Fetai.

Ai ka shtuar se çdo gënjeshtër që hidhet kundër tij dhe VLEN-it “vetëm sa forcon vendosmërinë” për të vazhduar me çmontimin e asaj që ai e quan “regjim i BDI-së”.
Në fund, ai e përmbylli mesazhin e tij me fjalët: “Vazhdoni fundërrina!”.