Fetai: Në vetëm dy javë, kemi bërë më shumë se sa të tjerët në dy dekada

Zëvendëskryeministri për Sistemin Politik dhe Marrëdhëniet ndërmjet Bashkësive, Arben Fetai, ka publikuar një përmbledhje të punëve të realizuara nga qeveria në vetëm dy javët e fundit, duke theksuar se rezultatet flasin vetë dhe se qytetarët tashmë bëjnë dallimin mes punës dhe propagandës.
Sipas Fetait, këto janë disa nga arritjet kryesore të kësaj periudhe:

Miratimi në Qeveri i Projektligjit historik për Përfaqësim të Drejtë dhe Adekuat, i cili vjen pas më shumë se dy dekadash premtime të pambajtura nga pushtetet e mëparshme.

Zgjidhja përfundimtare e të gjitha rasteve të personave pa shtetësi, një problematikë që rridhte nga shpërbërja e ish-Jugosllavisë, dhe që e bën Maqedoninë e Veriut shtetin e parë në rajon që e mbyll këtë çështje sipas UNHCR-së.

Miratimi i Strategjisë së re për Bashkëpunim me Shoqërinë Civile për periudhën 2025–2029, pas një periudhe të gjatë të anashkalimit të këtij sektori nga qeveritë e kaluara.

Zgjidhja e statusit të dhjetëra inspektorëve tatimorë komunalë, të cilët për vite me radhë ishin lënë pa licenca dhe të kategorizuar si punonjës administrativë.

“Qytetarët nuk bien më pre e mashtrimeve të atyre që vajtojnë privilegjet e tyre personale. Këto arritje dhe shumë të tjera që do të vijnë janë për të gjithë”, theksoi Fetai në postimin e tij, duke përfunduar me mesazhin: “Vazhdojmë”.