Zëvendëskryeministri Arben Fetai ka reaguar ashpër ndaj, siç i quajti ai, sulmeve të orkestruara nga BDI dhe mbështetësit e saj ndaj personalitetit të tij.
“Makineria propagandistike e BDI-së dhe e patericave të saj ka nisur një fushatë të egër kundër personalitetit tim. Përmes profileve të rreme, ata synojnë të njollosin emrin tim me lloj lloj shpifje e gënjeshtra,” deklaroi Fetai.
Ai tha se këto sulme nuk e dobësojnë, por përkundrazi e motivojnë më shumë. “Këto sulme të ulëta vetëm sa forcojnë vendosmërinë time për të ecur përpara, duke u ngritur mbi pisllëkun e tyre. Ata sulmojnë sepse lëvizja jonë u ka prishur planet,” shtoi ai.
Fetai theksoi tri gjëra për të cilat krenohet në karrierën e tij politike: “Për 20 vjet nuk kam keqpërdorur as edhe një qindarkë të burimeve publike. Jam i vetmi që kurrë nuk kam pasur bashkëpunim apo kompromis me BDI-në. Dhe askush nuk mund të ndikojë vendimet e mia, sepse varësia ime e vetme është ndaj popullit tonë.”
Duke iu përgjigjur fushatës kundër tij, ai u shpreh: “Sulmet e tyre vijnë nga profilet e rreme, sepse askush nuk mund të më përballë me akuza reale. Le të lehin zagarët. Karavani ynë ecën përpara, i pandalshëm, drejt një të ardhmeje ku shqiptarët fuqizohen, jo eksploatohen.”
Burimi: alfax.mk
