Zëvendëskryeministri Arben Fetai, ka reaguar ashpër në lidhje me përpjekjet e BDI-së për të paraqitur veten si zë i Kumanovës, duke e cilësuar këtë si një hipokrizi të papranueshme dhe fyese për qytetarët e kësaj komune.
“BDI nuk ka të drejtë morale për të folur në emër të Kumanovës. Kumanova ka paguar shtrenjtë tradhtitë dhe politikat antishqiptare të BDI-së. Me gjak, vuajtje dhe qindra vite burg të padrejtë”, ka shkruar Fetai në një reagim publik.
Ai ka përkujtuar disa nga rastet më të rënda që, sipas tij, e mbajnë përgjegjësinë politike pikërisht te drejtuesit e BDI-së: Rasti i montuar “Sopoti”. Rasti i montuar “Alfa”. Rasti i montuar “Monstra”. Vrasja e Komandant Shqiponjës. Rasti “Lagjja e Trimave”. Drejtësia e mohuar për vrasjen e Almirit të vogël
“Plagët e Kumanovës janë ende të hapura, dhe populli nuk harron. Kumanova mban mend. Kumanova nuk fal. Kumanova i ka shporrur BDI-në dhe Ali Ahmetin, fizikisht dhe politikisht”, ka theksuar Fetai.
Burimi: lajme24.mk
