Zëvendëskryeministri, Arben Fetai ka zhvilluar sot një takim me zëvendësdrejtorin e Agjencisë për Administratë, Muhamed Krasniqi, për të diskutuar përgatitjet për zbatimin e Ligjit për Përfaqësim të Drejtë dhe Adekuat, i cili tashmë është miratuar nga Qeveria. “Agjencia për Administratë është institucioni me kapacitetin administrativ dhe juridik për t’i zbatuar në praktikë rregullat e përfaqësimit të drejtë”, ka theksuar Fetai.
Sipas tij, ligji i ri i jep Agjencisë për Administratë rol kyç si dizajner dhe mbikëqyrës të politikave të punësimit në administratë, në përputhje me përbërjen etnike të popullsisë. “Ne po vijojmë me përkushtim të plotë t’i përgatisim institucionet për realitetin e ri sa i përket përfaqësimit të shqiptarëve në administratë”, u shpreh zëvendëskryeministri.
Fetai ka bërë të ditur se ky është vetëm fillimi i një procesi që do të monitorohet nga afër në çdo nivel: “Duke filluar me këtë takim dhe çdo ditë, çdo moment, në çdo institucion ne do të përcjellim mbarëvajtjen e procesit”.
Ligji për Përfaqësim të Drejtë dhe Adekuat konsiderohet si një nga masat më të rëndësishme të ndërmarra nga Qeveria aktuale për korrigjimin e padrejtësive historike dhe garantimin e përfaqësimit të barabartë të komuniteteve, me theks të veçantë për shqiptarët në administratën shtetërore.
Burimi: fol.mk
