Dje u shënua përvjetori i Ditës së Flamurit, një ditë simbolike për shqiptarët kudo ndodhen. Por këtë vit, festa i gjeti Shqipërinë dhe Kosovën nën hijen e ndryshimeve dhe zhvillimeve të theksuara politike që kanë ndikuar edhe në raportet mes dy qeverive.
Mungesa e mbledhjeve të përbashkëta mes dy shteteve, dikur një praktikë e rregullt bashkëpunimi, ka ngritur pikëpyetje për drejtimin që kanë marrë marrëdhëniet Kosovë–Shqipëri, pikërisht në një kohë kur nevoja për koordinim dhe organizime të përbashkëta duket më e domosdoshme se kurrë.
E në lidhje me raportet Kosovë-Shqipëri në një bashkëbisedim me “Bota sot” foli publicisti nga Shqipëria, Llesh Ndoj.
Së pari, ai tha se Kosovën dhe Shqipërinë i gjeti ky 28 nëntor, ashtu siç do armiku.
“Po të ishte gjallë Gjergj Fishta, jam i bindur se do t’i përgjegjej pyetjes me sentencën e njohur: bash si i don hasmi!” – deklaroi ai.
Megjithatë, Ndoj tha se në aspektin personal tha se mund të jemi më mirë, por e shqetëson kombi dhe sipas tij shtetet shqiptare nuk janë në zhvillimin e duhur.
Për këtë, ai përmendi disa pika, të cilat edhe i argumentoi.
“Në planin personal secili mund të jetë më mirë, por Flamuri ka të bëj me kombin dhe prosperitetin e tij, e parë kështu nuk jemi si duhet:
-Shqipëria po ecën drejt BE, por shqiptarët e kanë braktis vendin e ai po shkon drejt nje azili pleqsh pa sherbime; pozita e zhytur keqas në korrupsion dhe opozita në gjendje të rëndë!
-Kosova: pa qeveri tash 1 vit e me përparime minimaliste, kur kërkohen hapa kilometrikë…
-Çeshtja e shqiptarëve jashtë ketyre trojeve-shtet, në udhëkryq e me hapa pas, qoftë nën Serbi, në RMV e kudo. Çeshtja çame pa zot…
-Emigrantët shqiptarë të brezit të dytë e të tretë po harrojnë jo veç trojet, por edhe gjuhen shqipe, se dy shtetet tona nuk kanë asnjë program të koordinuar për këtë”, përfundoi Llesh Ndoj për “Bota sot”.
Burimi: botasot.info
