Qytetarët do të kenë më pak pritje në sportele dhe më shumë lehtësi në marrjen e dokumenteve bazë, falë digjitalizimit të një pjese të shërbimeve të Librave Amë. Lajmin e ka bërë të ditur drejtori i Librave Amë, Faton Fazliu, përmes një njoftimi publik.
“Sot po bëjmë një hap konkret drejt një administrate që i shërben qytetarit. Më pak tollovi, më shumë shërbim – një ndryshim që ia vlen, sepse prek përditshmërinë e secilit,” ka deklaruar Fazliu.
Sipas tij, qytetarët nuk duhet të humbin më kohë në sportele për dokumente bazë, pasi një pjesë e shërbimeve tashmë mund të kryhen online, pa pritje dhe pa radhë, përmes portalit shtetëror uslugi.gov.mk.
“Disa nga dokumentet më të kërkuara tani mund të merren online, thjesht dhe shpejt,” thekson Fazliu, duke përmendur certifikatën e lindjes, certifikatën e martesës, certifikatën e vdekjes, si dhe vërtetimin për gjendje të lirë martesore.
Ai shton se ky është vetëm fillimi i një procesi më të gjerë reformash në administratë. “Kjo është administratë që i shërben qytetarit – më pak stres, më pak humbje kohe dhe më shumë efikasitet. Ky është vetëm fillimi i një administrate më funksionale dhe më afër qytetarëve,” ka përfunduar drejtori i Librave Amë.
Burimi: alfax.mk
