Kryeministri Edi Rama ka reaguar ndaj akuzave të opozitës lidhur me përfshirjen e Shqipërisë në Bordin e Paqes, duke sqaruar se ftesa për anëtarësim ka ardhur drejtpërdrejt nga Presidenti i Shteteve të Bashkuara, Donald Trump.
Rama e cilësoi këtë ftesë si një ngjarje me domethënie të fortë politike dhe historike për vendin, ndërsa kritikoi zërat kundërshtues, të cilët sipas tij kanë shpërndarë “teori dhe përralla” për të krijuar tollovi.
Kryeministri theksoi se ftesa u pranua dhe u ratifikua në Kuvend edhe nga opozita, duke nënvizuar se Shqipëria, si një shtet që ka zgjedhur paqen si busull të përhershme, është tashmë vend anëtar themelues i këtij organizmi ndërkombëtar.
“Kjo javë nisi me një ftesë që tolloviti Shqipërinë, mund të thuhet tani, një ftesë përtej protokolleve zyrtare dhe me një domethënie shumë të fortë politike, po edhe historike sipas meje për Shqipërinë. Presidenti i Shteteve të Bashkuara, Donald Trump më dërgoi këtë ftesë për t’ju bashkuar atij në Bordin e Paqes, një organizëm i ri ndërkombëtar i themeluar po prej tij dhe për të pranuar që Shqipëria të jetë një vend anëtar themelues i këtij bordi.
Realisht, që ishte një ftesë e mirëseardhur. Por, edhe pse nuk e dyshoja që do kishte zhurmë dhe përpjekje për të bërë tollovi, nuk e mendoja që fantazitë dhe ligësia do të bashkoheshin për t’i dhënë jetë disa teorive dhe përrallave, që duhet të jesh vërtetë rëndë për të mos thënë ndonjë fjalë drejtpërdrejt të saktë, por jo të përshtatshme për këtë podkast që të arrish deri në pikat ku u arrit.
Gjithsesi, ftesa u mirëprit, u pranua, u ratifikua edhe në formën e një projektmarrëveshje, projektligji, në Kuvendin e Shqipërisë dhe Shqipëria si një shtet që ka zgjedhur paqen si busullën e vet të përhershme dhe që ka ditur të kontribuojë në tryeza të rëndësishme ndërkombëtare e pranoi me një PO të fortë, – edhe me votat e atyre, që deri në momentin që votuan, nuk lanë gjë pa thënë, por kjo është një temë krejt tjetër, – përkatësinë në këtë në këtë bord”, tha Rama.
Burimi: botasot.info
