Organizata Ndërkombëtare Detare (IMO) ka njoftuar se ka evakuuar rreth 2,500 marinarë të bllokuar në Ngushticën e Hormuzit, përpara se të pezullonte operacionin pas sulmit ndaj një anijeje mallrash të enjten.

Sekretari i Përgjithshëm i IMO-s, Arsenio Dominguez, deklaroi se në operacionin e evakuimit, i cili nisi më herët gjatë kësaj jave, u angazhuan të paktën 115 anije.

Sipas tij, organizata me seli në Londër po zhvillon bisedime me Iranin, Omanin dhe Shtetet e Bashkuara për të siguruar garanci të reja sigurie, me qëllim rifillimin e operacionit të evakuimit.

IMO kishte bërë të ditur një ditë më parë se synonte të evakuonte mbi 11 mijë marinarë të mbetur të bllokuar në këtë rrugë ujore strategjike.

Ngushtica e Hormuzit është përfshirë nga tensione të larta prej javësh, pasi Irani ka ndërmarrë kërcënime dhe sulme ndaj anijeve tregtare, ndërsa Shtetet e Bashkuara iu përgjigjën me një bllokadë të porteve iraniane.

Sipas të dhënave të IMO-s, më shumë se 40 anije tregtare janë sulmuar që nga fillimi i konfliktit, ndërsa të paktën 14 marinarë kanë humbur jetën.

Burimi: opinion.al