Drejtori i Entit Shtetëror të Pronësisë Industriale dhe anëtar i koalicionit VLEN, Eljesa Neziri, ka reaguar pas miratimit të Ligjit për Institucionet e Arsimit të Mesëm të Bashkësive Fetare, me të cilin Medreseja e Isa Beut zyrtarisht barazohet me të gjitha shkollat e tjera të mesme në vend.
“Sot ndiej krenari dhe emocion të veçantë. Me 80 vota PRO, Kuvendi miratoi Ligjin për Institucionet e Arsimit të Mesëm të Bashkësive Fetare. Nga sot, Medreseja e Isa Beut zyrtarisht njihet si shkollë e barabartë me të gjitha shkollat e tjera të mesme,” shkruan Neziri.
Ai këtë vendim e ka cilësuar si arritje të madhe me vlerë personale, duke kujtuar se prindërit e tij kanë mësuar në këtë medrese, ndërsa babai i tij, ish-luftëtar i UÇK-së, nuk jeton më.
“Për mua kjo nuk është thjesht një arritje ligjore, është histori familjare. Në bankat e kësaj medreseje kanë mësuar nëna dhe babai im. Babai, i cili më vonë u bë luftëtar i UÇK-së dhe që sot nuk jeton më, besonte se sakrifica e tij do t’i hapte rrugë një të ardhme më të drejtë për ne. Sot ndjej se ëndrra e tij dhe e shumë brezave po bëhet realitet,” shton ai.
Neziri përmbylli reagimin e tij me mesazhin: “Për këtë po punojmë si VLEN sepse ia VLEN!”
