Ekrem Hyseni sërish kandidat i LDK-së për kryetar të Podujevës

Ekrem Hyseni ka zyrtarizuar sot kandidaturën e tij për kryetar të Komunës së Podujevës, duke u rikthyer në garën elektorale me mbështetjen e Lidhjes Demokratike të Kosovës (LDK).

Përmes një postimi në Facebook, Hyseni tha se vendimi për kandidim vjen si përgjigje ndaj vullnetit të qytetarëve llapjanë dhe përballë, siç e cilësoi ai, “keqqeverisjes, nepotizmit dhe keqpërdorimit”.

“Derisa kërkoj besimin tuaj, e jap betimin tim se: do t’ju shërbej me nder, përgjegjësi e profesionalizëm”, theksoi Hyseni në fjalën e tij, duke shtuar se dera e tij do të jetë gjithmonë e hapur për secilin qytetar.

Ai premtoi angazhim të përditshëm me të gjitha kategoritë e shoqërisë – nga mësuesi e polici, deri te bujku e zjarrfikësi – dhe kërkoi mobilizim të përgjithshëm për ta kthyer besimin në institucione dhe për ta ndalur siç tha “ndaljen e projekteve në Podujevë”.

“Fitorja e LDK-së në Llap nuk është vetëm synim, por është mision”, deklaroi ai, duke kërkuar nga qytetarët që të angazhohen e të bisedojnë me familjarë e miq për ta përkrahur këtë “mision të përbashkët”.

“Pres që fitorja të jetë aq e fuqishme sa t’ua prishë çdo matematikë e çdo kalkulim të tyre”, përfundoi Hyseni mesazhin e tij drejtuar qytetarëve të Podujevës.