Kandidati i VLEN-it për kryetar të Komunës së Çairit dhe njëherësh zëvendëskryeministër i parë, Izet Mexhiti, ka bërë të ditur sot një përforcim të madh në ekipin e tij. Profesor Bujamin Bela, akademik i doktoruar në fushën e menaxhmentit në Universitetin e Stambollit, një nga institucionet më prestigjioze ndërkombëtare i është bashkuar si këshilltar për çështje ekonomike dhe buxhetore.
Mexhiti theksoi se Çairi ka nevojë për vendime të mençura strategjike dhe për ekspertë që dinë t’i çojnë përpara proceset. Ai vlerësoi se prof. Bela, i cili është dalluar si student i shkëlqyeshëm dhe sot është profesionist me dije të thella e vizion të qartë, do të jetë një aset i madh për zhvillimin e komunës së Çairit.
“Mirë se vjen në ekipin fitues, profesor!”, shkroi Mexhiti, duke lënë të kuptohet se fitorja e VLEN-it në Çair nuk është vetëm politike, por edhe profesionale, duke u mbështetur në ekspertizën e njerëzve që garantojnë zhvillim dhe përparim të vërtetë për qytetarët.
