Ashtu si Komuna e Malishevës, edhe Komuna e Fushë Kosovës ka shtyrë fillimin e gjysmëvjetorit të dytë për shkak të kushteve të pafavorshme atmosferike dhe vështirësive në sigurimin e ngrohjes në disa institucione arsimore.
Drejtoria për Arsim në Komunën e Fushë Kosovës ka njoftuar se fillimi i gjysmëvjetorit të dytë shtyhet deri më 19.01.2026. Sipas njoftimit, vendimi është marrë si pasojë e gjendjes aktuale të krijuar nga kushtet atmosferike, ku reshjet e shiut dhe borës kanë vështirësuar qarkullimin, si dhe për shkak të vështirësive në sigurimin e ngrohjes në disa institucione arsimore.
DKA ka vlerësuar se nuk janë krijuar kushtet minimale për zhvillimin normal të procesit arsimor. Vendimi është marrë në funksion të sigurisë së nxënësve dhe stafit arsimor, si dhe për të garantuar mbarëvajtjen e rregullt të procesit mësimor.
Drejtuesit e institucioneve arsimore janë lutur që të njoftojnë me kohë stafin mësimdhënës dhe prindërit për këtë vendim. Për informata shtesë, publiku do të njoftohet përmes kanaleve zyrtare.
Edhe Komuna e Malishevës ka marrë vendim për shtyrjen e fillimit të gjysmëvjetorit të dytë në të gjitha shkollat e kësaj komune.
Përmes një njoftimi zyrtar të publikuar në rrjetin social Facebook, Komuna ka bërë të ditur se procesi mësimor do të shtyhet deri më 14 janar 2026.
Burimi: botasot.info
