Prokuroria pranë Gjykatës së Shkallës së Parë në Tiranë ka përfunduar hetimet dhe ka dërguar në gjyq katër persona, të akuzuar për veprën penale “Rrëmbimi ose mbajtja peng e personit”.
Sipas njoftimit zyrtar, shtetasit S.S., N.B., I.M. dhe K.S. akuzohen se kanë rrëmbyer shtetasin E.V., me qëllim përfitimin e një shume prej 2 milionë lekësh. Prokuroria sqaron se hetimet nisën pas kallëzimit të shtetases A.V., e cila raportoi se vëllai i saj kishte marrë një telefonatë nga bashkëshortja, e cila kërkonte pagesën e shumës së lartë për shkak të rrezikut për jetën e tij.
“Nga hetimet rezultoi se të katër të pandehurit planifikuan dhe ekzekutuan rrëmbimin e shtetasit E.V.,” thuhet në njoftim. Ata e futën në mënyrë të dhunshme në një mjet tip Golf me ngjyrë të zezë pranë shkollës pedagogjike në Tiranë, i vendosën kapuç në kokë dhe e çuan në një banesë të vjetër ku e mbajtën peng.
“Pas lidhjes së duarve, ata i kërkuan shumën prej 2 milionë lekë, me pretendimin se viktima kishte ngacmuar shtetasen N.B., bashkëjetuesen e njërit prej të arrestuarve,” vijon njoftimi i Prokurorisë.
Më tej, tre nga të pandehurit komunikuan me bashkëshorten e viktimës dhe më pas ajo iu dërgoi shumën e kërkuar. Gjatë gjithë kohës, rrëmbyesit kërcënuan se nëse pagesa nuk do të realizohej, do t’i dërgonin fotografi komprometuese për të shkatërruar familjen dhe do ta vrisnin viktimën.
Prokuroria thekson se “rrëmbimi ose mbajtja peng e personit me qëllim përfitimin e pasurisë dënohet me burgim nga dhjetë deri në njëzet vjet,” duke bërë të qartë rreziqet ligjore që presin të akuzuarit.
Burimi: botasot.info
