Partia Socialiste ka paraqitur në Sekretariatin e Etikës kërkesat për masa disiplinore ndaj deputetëve të opozitës pas incidenteve të regjistruara në seancën e fundit parlamentare.
Sipas kërkesës, për Flamur Nokën propozohet përjashtim nga Kuvendi për 60 ditë. Ndërsa për Elda Hotin dhe Albana Vokshin kërkohet përjashtim për 30 ditë secila.
Përplasjet nisën gjatë seancës plenare, kur u kërkua mbajtja e një minute heshtje në përkujtim të ngjarjeve të 2 prillit 1991 në Shkodër. Deputetët e Partisë Demokratike e kundërshtuan këtë veprim dhe e konsideruan provokues.
Situata u përshkallëzua edhe gjatë ndërprerjes së seancës. Flamur Noka iu drejtua Taulant Ballës me tone kërcënuese, duke përdorur shprehje fyese.
Një tjetër incident përfshiu deputeten Elda Hoti, e cila mori kartën e mikrofonit nga Bora Muzhaqi. Në këtë moment ndërhyri Taulant Balla dhe debatoi me të për veprimin.
Tensione pati edhe mes Albana Vokshit dhe Bora Muzhaqit, duke shtuar klimën e përplasjes në sallën e Kuvendit.
Sekretariati i Etikës pritet të shqyrtojë kërkesat dhe të vendosë për masat disiplinore.
Burimi: botasot.info
