Dita Botërore e Vullnetarizmit. Gashi: Vullnetarizmi është përgjegjësi morale, institucionale dhe njerëzore

Kryetari i Kuvendit, Afrim Gashi, shënoi Ditën Botërore të Vullnetarizmit duke iu bashkuar aktiviteteve vullnetare së bashku me deputetët e Kuvendit, në bashkëpunim të ngushtë me Kryqin e Kuq të Maqedonisë së Veriut.

Gashi theksoi se vullnetarizmi nuk është vetëm thirrje, por një akt përgjegjësie. “Vullnetarizmi është përgjegjësi morale, institucionale dhe njerëzore. Ne duhet të japim shembull me veprim, jo vetëm me fjalë,” deklaroi ai.

Në fjalimin e mbajtur në Kuvend, Kryeparlamentari shprehu mirënjohje të veçantë për 5000 vullnetarët aktivë, duke vlerësuar lart angazhimin e tyre, sidomos gjatë tragjedisë në Koçan. “Solidariteti që treguan në ditët më të vështira ishte dritë dhe shpresë për të gjithë vendin,” u shpreh Gashi.

Ai gjithashtu falënderoi Kryqin e Kuq për rolin e tij të pazëvendësueshëm si partner humanitar i shtetit, duke theksuar se bashkëpunimi institucional mbetet esencial.

Si pjesë e aktiviteteve të ditës, në Kuvend u nënshkrua Deklarata Parlamentare për Mbështetjen e Vullnetarizmit, një zotim i përbashkët për përmirësimin e kushteve dhe mbështetjes për të gjithë vullnetarët në vend.

“Urime Ditën Botërore të Vullnetarizmit!” përfundoi Gashi.