Dhoma e Avokatisë Berat ka dalë hapur kundër miratimit të Draft-Kodit të ri Penal, duke paralajmëruar se ai përbën një rrezik serioz për profesionet e lira në vend. Në një reagim zyrtar të publikuar nga Sekretari i Dhomës, Av. Erion Ismailaj, theksohet se propozimet e reja ligjore prekin drejtpërdrejt punën e avokatëve, kontabilistëve, përkthyesve, ekspertëve dhe profesionistëve të tjerë të pavarur.
“Si avokat dhe pjesë e sistemit të drejtësisë, ndjej detyrimin profesional dhe qytetar të shpreh kundërshtimin tim të prerë ndaj Draft-Kodit të ri Penal, i cili ndodhet në proces miratimi nga Kuvendi i Shqipërisë. Ky draft nuk është një reformë për drejtësi më të mirë. Përkundrazi, ai përmban elementë që rrezikojnë seriozisht profesionet e lira, përfshirë avokatët, kontabilistët, përkthyesit, ekspertët privatë dhe shumë të tjerë,” u shpreh Ismailaj.
Sipas tij, drafti përmban disa probleme të rënda, ndër të cilat spikat:
Kriminalizimi i shpërblimit profesional: Dispozitat parashikojnë ndjekje penale për pagesat që profesionistët marrin për punën e tyre, nëse ato konsiderohen si “të pajustifikuara” apo “të papërshtatshme”, duke cenuar ndjeshëm marrëdhëniet kontraktore dhe krijuar pasiguri te profesionistët e ndershëm.
Goditja e pavarësisë profesionale: Drafti hap rrugë për ndjekje penale ndaj avokatëve dhe profesionistëve që këshillojnë ose përfaqësojnë klientë, duke minuar të drejtën për mbrojtje dhe pavarësinë e profesionit ligjor.
Gjuhë e paqartë ligjore: Terma si “mosmarrje masash”, “mosrespektim i përgjegjësisë”, apo “rrezik i lartë”, janë të paqarta dhe të hapura për interpretim të gjerë, duke rrezikuar që çdo gabim teknik të kthehet në vepër penale.
Mungesa e konsultimit publik: Kodi i ri është hartuar pa përfshirjen e Dhomave të Avokatisë, profesionistëve apo shoqërisë civile, duke cenuar transparencën dhe legjitimitetin e tij.
“Ky draft rrezikon të ngufasë zërat kritikë dhe profesionet e pavarura, të frikësojë profesionistët, dhe të minojë shtetin e së drejtës në vendin tonë. Nëse ky kod miratohet në formën aktuale, ai nuk do të jetë një mjet për drejtësi më të mirë, por një rrezik për lirinë e çdo profesionisti dhe qytetari të ndershëm,” përfundon deklaratën Av. Ismailaj.
Burimi: botasot.info
