Deputetja e VLEN-it, Imërlije Saliu: Qytetarët e Gostivarit meritojnë përgjigje për projektin 7.132.000 euro të ujësjellësit

Deputetja e VLEN-it, Imërlije Saliu, ka reaguar lidhur me gjendjen e krijuar në Gostivar pas problemeve me ujin e pijshëm, duke ngritur pyetje për mënyrën e realizimit të projektit milionësh për rinovimin e rrjetit të ujësjellësit.

Sipas saj, për këtë projekt janë destinuar gjithsej 7.132.000 euro, përkatësisht 4.5 milionë euro grant nga SECO, afro 2 milionë euro nga Banka Gjermane për Zhvillim (KfW) dhe 682.000 euro nga Komuna e Gostivarit.

Deputetja thekson se, pavarësisht këtij investimi të madh, qytetarët e Gostivarit janë përballur me një situatë shqetësuese, me qindra të sëmurë, persona në paraburgim dhe dyshime serioze për keqmenaxhim të projektit.

“Kush mban përgjegjësi për dështimin e një projekti prej 7.132.000 eurosh? Ku përfunduan këto mjete? Qytetarët e Gostivarit meritojnë të dinë të vërtetën!”, ka deklaruar deputetja e VLEN-it, Imërlije Saliu.