Një delegacion nga Ambasada Gjermane në Kosovë ka zhvilluar sot një vizitë zyrtare në Qendrën Korrektuese në Dubravë, me qëllim njohjen më të afërt me funksionimin e sistemit korrektues në vend dhe praktikat që zbatohen në këtë institucion,, njofton Shërbimi Korrektues i Kosovës.
Delegacioni gjerman u kryesua nga Sekretari i Parë i Ambasadës, Frank Hilla, i shoqëruar nga z. Arben Lubach, përfaqësues nga zyra e Këshillit të Evropës. Ata u pritën nga Ushtruesi i Detyrës së Zëvendësdrejtorit të Përgjithshëm të Shërbimit Korrektues të Kosovës, Besar Gashi, Drejtori i Qendrës Korrektuese në Dubravë, Sami Gashi, dhe Drejtori i Departamentit Shëndetësor të Burgjeve, Milazim Gjocaj.
Gjatë takimit, palët diskutuan për mundësitë e bashkëpunimit në fushën e menaxhimit të institucioneve korrektuese, si dhe shkëmbimin e përvojave dhe praktikave më të mira në këtë sektor. Zyrtarët gjermanë shprehën interesimin e tyre për mbështetjen e mëtejme të sistemit të burgjeve në Kosovë, përmes projekteve konkrete që synojnë fuqizimin dhe modernizimin e tij.
Sipas njoftimit të SHKK-së në takim është theksuar gjithashtu rëndësia e koordinimit të ngushtë me Këshillin e Evropës, si një partner strategjik i Shërbimit Korrektues të Kosovës, si dhe roli mbështetës i Ambasadës Gjermane në realizimin e projekteve reformuese në këtë fushë.
Burimi: botasot.info
