Kandidati i VLEN për komunën e Haraçinës, Daut Beqiri në një intervistë në Alsat-M, ka thënë se deri tani nga garnitura e kaluar ka pasur mungesë të vullnetit për t’u dukur Haraçina më mirë.
“Kemi pasur deputet, përfaqësues shqiptarë në qeveri edhe ministra, por Haraçinën e kanë lënë pas dore. Pak të kishin qenë të interesuar, sot do kishim folur për projekte konkrete, e jo për kushte elementare për jetë”, thotë Beqiri.
Në programin e tij, thotë se ka edhe deponitë e egra, ku tre dekada me radhë banorët e Haraçinës po helmohen.
“Para disa javësh u ngritën në protestë banorët dhe ngritën zërin e tyre ku me insistimin e zëvendëskryeministrit të parë Izet Mexhiti, deponia në dalje të Haraçinës në Nikushtak u mbyll tërësisht, ndërsa tani qytetarët kanë nis të mbjellin fidanë”, tha ai.
Sa i takon sferës së arsimit, si problematikë ai locon mungesën e kuadrit adekuat në shkolla për disa lëmi. Por, thotë se do të subvencionohen nxënësit dhe studentët më të mirë dhe siç shton, “dera e kryetarit të Haraçinës në këtë drejtim do të jetë e hapur”.
Ai e lë të hapur mundësinë e hapjes së një shkolle të mesme, nëse këtë e kërkojnë prindërit, ndërsa në program thotë se ka edhe subvencionimin e bujqve.
Siguria publike, poashtu është një ndër prioritetet e Beqirit ku me decentralizim të mirëfilltë, komuna do të jetë pjesë e vendimmarrjes edhe në këtë fushë.
“Nuk është edhe ajo që thuhet se nuk ka siguri, por pjesa më e pasigurt është mungesa e kushteve infrastrukturore, rrugët e paasfaltuara, mungesa e sinjalistikës rrugore”, ka thënë mes tjerash Beqiri nga VLEN.
Ndryshe, programi i tij parasheh edhe investime në sferën e sportit, ku për klubin e Shkëndijës së Haraçinës, siç nënvizon do të ketë dy fusha, një për zhvillimin e ndeshjeve dhe paralelisht një për stërvitje.
