Dalin pamjet: Ukrainasit sulmojnë një port dhe një rafineri ruse

Dronët ukrainas mbrëmë kryen sulme ndaj objekteve kyçe energjetike ruse, duke goditur portin detar Temryuk në rajonin e Krasnodarit dhe rafinerinë e naftës Sizran në krahinën e Samaras, sipas raportimeve të zyrtarëve dhe mediave ruse, shkruan The Kyiv Independent.

Shtabi operativ i rajonit të Krasnodarit konfirmoi se në portin Temryuk ka pasur dëme pas një sulmi me dron që shkaktoi zjarr. Edhe pse autoritetet rajonale nuk specifikuan se cilat objekte janë goditur, ato thanë se janë “dëmtuar elemente të infrastrukturës portuale”.

I gjithë personeli u evakuua dhe nuk ka raportime për viktima. Sipas pamjeve të dëshmitarëve okularë të analizuara nga media opozitare ruse Astra, duket se pas sulmit ka marrë flakë një terminal gazi. Porti Temryuk është një objekt i rëndësishëm rus në Detin Azov, me terminale për eksportin e naftës dhe gazit të lëngshëm.

More footage of the area near the Syzran refinery in the Samara region, Russia. Russian air defense tried to intercept the Ukrainian UAVs. pic.twitter.com/f9NPR4udtx

— (((Tendar))) (@Tendar) December 5, 2025

Po atë natë, banorët e qytetit Sizran në krahinën e Samaras, rreth 700 kilometra larg kufirit ukrainas, raportuan shpërthime në rafinerinë lokale të naftës. Në rrjetet sociale u publikuan video dhe foto që supozohet se paraqesin sulmin.

Kryetari i bashkisë së Sizranit, Sergey Volodchenkov, konfirmoi sulmin me dron ndaj qytetit, por nuk përmendi objektivat e goditura. Rafineria Sizran, e hapur në vitin 1942, është në pronësi të kompanisë shtetërore Rosneft dhe ka një kapacitet vjetor përpunimi prej 8.5 milionë tonësh naftë.

Këto sulme janë pjesë e një fushate më të gjerë ukrainase të drejtuar kundër industrisë ruse të naftës, e cila siguron fonde dhe karburant thelbësor për përpjekjet luftarake të Moskës.

Impianti në Sizran ka qenë më parë objektiv sulmesh. Kievi përdor vazhdimisht dronë vendas me rreze të gjatë për të goditur infrastrukturën ruse të naftës, dhe zyrtarët qeveritarë e ushtarakë ukrainas i quajnë këto sulme “sanksionet me rreze të gjatë” të Kievit.