Finalja e Miss Universe 2025 solli një situatë të paprecedentë për Shqipërinë: përfaqësuesja zyrtare, Flavia Harizaj (Miss Universe Albania), nuk u shfaq aspak në skenë, duke lënë vendin pa asnjë prezencë në garën më të madhe të bukurisë në botë. Mungesa e saj, pa asnjë njoftim paraprak apo shpjegim publik, u komentua gjerësisht si veprim joprofesional dhe ngriti shumë pikëpyetje mbi atë që kishte ndodhur në prapaskenë.
Vetëm pasi rrjetet sociale “u ndezën” me kritika dhe dyshime, Flavia reagoi me dy postime të gjata në Instagram Story, ku tentoi të qartësonte vendimin e saj dhe arsyet pse zgjodhi të tërhiqej.
Në mesazhin e parë, ajo thekson se, pavarësisht çdo titulli apo skene, realiteti i jetës së saj private është shumë më i çmuar. Ajo flet për një jetë të qetë, të mbushur me njerëz që e duan sinqerisht, me momente të thjeshta që i japin lumturi dhe me një paqe që sipas saj nuk ia jep asnjë skenë botërore.
Në postimin e dytë, Harizaj bën një sqarim më të drejtpërdrejtë për procesin e Miss Universe, duke thënë se çdo hap që ka bërë ka qenë vendim personal dhe se askush tjetër nuk ka marrë vendime në emrin e saj. Ajo nënvizon se e gjithë përgatitja dhe presioni i garës i kanë rënë mbi supe, duke theksuar se në situata të tilla duhet të ekzistojë një ekip profesionist dhe një strukturë mbështetëse.
Burimi: botasot.info
