Çmimet e importit në tremujorin e tretë në Shqipëri regjistruan një ulje të lehtë prej 0,5%, krahasuar me të njëjtën periudhë të vitit 2024, ndërsa në raport me tremujorin paraardhës shënuan rënie me 0,2%.
Referuar raportit të Institutit të Statistikave (INSTAT), ulja vjetore e çmimeve të importit u ndikua kryesisht nga sektori “energjia elektrike, gazi, avulli dhe ajri i kondicionuar”, ku çmimet ranë me 4,6%.
Rënie u regjistrua gjithashtu në “furnizimin me ujë dhe aktivitetet e trajtimit të mbeturinave” me 0,7%, si edhe në “industrinë përpunuese”, që përfaqëson 94% të peshës totale të indeksit, me një ulje prej 0,3%.
Brenda industrisë përpunuese, zbritjen më të theksuar të çmimeve e pësuan aktivitetet e “përpunimit të produkteve ushqimore” me 1,7%, të ndjekura nga “prodhimi i drurit dhe produkteve prej druri” me 1,2%, “konfeksionimi i veshjeve” me 0,8%, “prodhimi i pijeve” me 0,6% dhe “prodhimi i kimikateve” me 0,5%.
Ndërkohë, rritje të çmimeve shënuan “industritë e tjera” me 1,3%, “prodhimi i produkteve të duhanit” me 1,1% dhe “shtypshkrimi” me 0,8%.
Në ndryshimin tremujor, sektori i energjisë regjistroi një ulje prej 1,1%, ndërsa industria përpunuese ra me 0,1%.
Rritje u vërejt në seksionin e “furnizimit me ujë dhe menaxhimit të mbetjeve” me 0,9%.
Te industria përpunuese, ulja më e madhe u shënua te “përpunimi i produkteve ushqimore” me 1,3%, pasuar nga “prodhimi i kimikateve” me 0,9% dhe “përpunimi i tekstileve” me 0,6%.
Rritje tremujore shënuan çmimet e “produkteve metalikë të fabrikuar” me 0,8% dhe ato të “produkteve të duhanit” me 0,7%.
Burimi: botasot.info
