Presidentja e Komitetit të Helsinkit për të Drejtat e Njeriut në Serbi, Sonja Biserko, ka vlerësuar si domethënës propozimin e kryeministrit të Kosovës, Albin Kurti, për krijimin e një gjykate të posaçme që do të hetonte dhe gjykonte vrasjet e civilëve nga snajperët gjatë rrethimit të Sarajevës, shkruan “Slobodna Bosna”, transmeton KosovaPress.
Ndonëse shanset për themelimin e një gjykate të re ndërkombëtare janë të vogla, sipas Biserkos, iniciativa tregon se çështja e drejtësisë për krimet e kryera në Bosnjë e Hercegovinë, gjatë viteve ’90 mbetet e hapur dhe se kujtesa për viktimat vazhdon të jetë pjesë e debatit publik dhe politik në rajon.
“Vuçiç ishte në varrezat hebraike ndërsa Sarajeva po qëllohej, dhe ‘Safari i Sarajevës’ vërteton degradimin e plotë moral të presidentit serb… Mendoj se shanset për një gjykatë të re ndërkombëtare janë të vogla, por vetë ideja e kryeministrit të Kosovës, Albin Kurti, është domethënëse sepse tregon se lufta e viteve nëntëdhjetë nuk ka mbaruar shoqërisht”, tha ajo.
Kryeministri i Kosovës, Albin Kurti, ka kërkuar themelimin e një Gjykate Speciale për të hetuar dhe gjykuar vrasjen e civilëve boshnjakë me snajper në vitet e 90-ta. Sipas tij, thuhet se rol në “Sarajevo safari” ka pasur edhe presidenti i Serbisë, Aleksandar Vuçiq, ku për një shumë të hollash nga kodrat përreth Sarajevës mund të qëlloje boshnjakë civilë.
Hetimi italian për ‘Sarajevo Safari’ filloi më 9 shkurt 2026, me dëgjimin e një italiani të dyshuar për pjesëmarrje në të, ndërkaq Biserko në intervistën për “Slobodna Bosna” tha se nuk e di nëse mund të ketë dëshmitarë nga Serbia për shkaqe të sigurisë.
“Është e mundur që të ketë dëshmitarë, por mbetet një pyetje e hapur nëse ata janë mjaftueshëm të guximshëm për të dalë përpara.”
Burimi: botasot.info
