Deputeti i BDI-së, Blerim Bexheti, ka reaguar ashpër ndaj raportimeve mediatike për kompaninë e themeluar nga dy fëmijët e tij madhorë, duke i quajtur ato të pavërteta dhe senzacionaliste, informon PressOnline.al

Bexheti thekson se kompania është hapur në mënyrë plotësisht ligjore dhe transparente, nuk ka fituar asnjë tender, nuk ka lidhur kontrata dhe nuk ka nisur aktivitet biznesi. Sipas tij, po ndërtohet artificialisht një “skandal” për të njollosur emrin e tij dhe familjen.

Ai sqaron se e vetmja çështje lidhet me mosdeklarimin me vonesë të kompanisë në Komisioni Shtetëror për Parandalimin e Korrupsionit (KSHPK), duke shtuar se nëse vlerësohet si obligim ligjor, është i gatshëm ta paraqesë.

Reagimi vjen pasi Radio Evropa e Lirë raportoi se fëmijët e tij kanë themeluar kompani me veprimtari ndërtimore.

“Kur nuk kanë argumente kundër meje, sulmojnë fëmijët e mi,” përfundon Bexheti.