Në lagjen “Dardania 2” në Prizren është përuruar njëra ndër shkollat më të mëdha, një investim i Bashkimit Evropian në vlerë prej 5.2 milionë eurosh.
Ky objekt shkollor do t’u ofrojë nxënësve dhe mësimdhënësve kushte bashkëkohore në mësimdhënie dhe mësimnxënie.
“Është një objekt më standarde shumë të mira, i jemi falënderues Bashkimit Evropian që kanë investuar, por edhe të gjithë atyre që kanë kontribuar në mënyrë që ky projekt të realizohet. Krijon kushte shumë të mira për nxënësit dhe mësimdhënësit, inventarizimi ende nuk ka përfunduar, por do të ketë ende pajisje të reja”, ka thënë Shaqir Totaj, kryetari i Prizrenit.
Edhe drejtoresha e Arsimit, Luljeta Veselaj Gutaj, ka falënderuar Bashkimin Evropian, që ia besoi këtë projekt të madh Prizrenit.
“Nuk ka më bukur dhe më mirë që në këtë fillim shtatori, t’i hapim dyert e një foleje të dijes, duke i dhënë forcë një projekti madhështor të BE-së”, ka thënë ajo.
“Kjo shkollë, nuk është thjeshtë një ndërtesë, ajo është një hap i madh drejt së ardhmes, brenda këtyre mureve, do të rriten breza që do të qojnë përpara dijen, kulturën dhe vlerat e qytetit”, ka deklaruar në anën tjetër Belkize Shehu, drejtoresha e shkollës.
Në realizimin e këtij projekti ka dhënë kontribut edhe Ministria e Administrimit të Pushtetit Lokal. Shkolla, e ndërtuar sipas standardeve moderne evropiane, ka 24 dhoma mësimi, kabinete, laboratorë, si dhe hapësira për parashkollorë.
Përveç kësaj, shkolla posedon edhe sallë për edukatë fizike dhe zyra administrative për personelin mësimor.
Burimi: botasot.info
