Bashkimi Evropian i ka kërkuar kompanisë SpaceX, në pronësi të Elon Musk, të rikthejë plotësisht shërbimin e internetit satelitor Starlink në Ukrainë, pas raportimeve për kufizime që prekin funksionimin e tij.
Një zëdhënës i BE-së deklaroi në Bruksel se situata është shqetësuese dhe kërkoi që shërbimi të rikthehet sa më shpejt në kapacitet të plotë, duke kujtuar se më parë ai ishte ofruar pa kufizime të tilla.
Starlink luan një rol të rëndësishëm në Ukrainë, veçanërisht për komunikimet dhe kontrollin e dronëve që përdoren për mbrojtjen e territorit të vendit.
Sipas përfaqësuesit të BE-së, lufta në Ukrainë ka treguar rëndësinë strategjike të sistemeve satelitore për sigurinë evropiane dhe varësinë në rritje nga teknologjitë hapësinore.
Në këtë kuadër, Bashkimi Evropian po punon për zhvillimin e rrjetit të ri satelitor IRIS2, i cili parashikohet të përbëhet nga më shumë se 300 satelitë dhe të ofrojë komunikime të sigurta për përdorim civil dhe ushtarak.
Zëdhënësi konfirmoi gjithashtu se Ukraina do të përfshihet plotësisht në këtë projekt, i cili synon të forcojë pavarësinë teknologjike dhe kapacitetet e komunikimit të Evropës.
Nisma vjen në një kohë kur infrastruktura satelitore po merr një rëndësi gjithnjë e më të madhe për mbrojtjen dhe sigurinë, veçanërisht në kushtet e luftës në Ukrainë.
Burimi:TV21
