Konventa promovuese e koalicionit VLEN, e mbajtur mbrëmë në sallën “Boris Trajkovski” në Shkup, e dëshmoi qartë realitetin politik: qytetarët po se po, por edhe mbështetësit e dikurshëm i kanë braktisur. Pavarësisht propagandës së shfrenuar dhe presioneve të paligjshme të pushtetit, salla mbeti me ulëse të zbrazura, ndërsa atmosfera e gjallë e vërtetë rrihte nëpër çarshitë shqiptare, nga Shkupi e Kumanova, në Gostivar, Tetovë, Kërçovë e deri në Strugë.
Populli nuk u përgjigj thirrjes për të mbështetur një projekt që tashmë ka humbur çdo kredibilitet dhe është shndërruar në mashtrim të madh. Shkaku është i qartë: VLEN nuk ka përmbushur asnjë, absolutisht asnjë nga premtimet e dhëna. Nga fjalët e mëdha të fushatës, sot kanë mbetur vetëm zhgënjimi dhe mashtrimet e zbuluara:
•Premtuan 2.500 punësime, qytetarët përfunduan me zero.
•Premtuan 10.000 euro për çdo qytetar, qytetarët përfunduan me zero.
•Premtuan Akademi të Shkencave shqiptare, e sollën Dodikun dhe donacionet serbe.
•Premtuan bankë shqiptare, e sollën bankën serbe.
•Premtuan ndryshime kushtetuese dhe integrim europian, e sollën “botën serbe”.
•Premtuan programe kombëtare, e sollën MTEL-in serb.
•Premtuan respektim të Marrëveshjes së Ohrit, e dorëzuan në duart e putinistit Ivan Stoilkoviq.
Konventa e vakët e VLEN-it është fotografia më e qartë e dështimit të tyre. Shqiptarët tashmë e kanë dhënë gjykimin e tyre: ata nuk u besojnë më, i kanë braktisur dhe i shohin ashtu siç janë – si degë e VMRO-së te shqiptarët.
Më 19 tetor, qytetarët do ta vulosin me votë këtë verdikt: VLEN është mashtrim, është “frankenshtajni” politik i Mickoskit, ndërsa BDI mbetet adresa e vetme e shqiptarëve për përfaqësim të fuqishëm, dinjitoz dhe europian.
