Basha përkujton Nënën Terezë, në 28-vjetorin e ndarjes nga jeta

Kryetari i Kuvendit të Republikës së Kosovës, Dimal Basha, ka përkujtuar sot humanisten e madhe shqiptare, Nënën Terezë, në 28-vjetorin e ndarjes së saj nga jeta.

Në shënimin e tij kreu i Kuvendit ka potencuar se bamirësia dhe mbështetja për nevojtarët janë pjesë e qenësishme e karakterit të popullit tonë, por ishte Nënë Tereza ajo që i transmetoi këto vlera përtej çdo kufiri.

“Dashuria, mirësia dhe shpirtbardhësia janë vlera të çdo nëne shqiptare, por u desh që një Gonxhe shqiptare të shndërrohej në një Nënë Terezë, që t’i ngriste këto vlera në nivel botëror, duke i reflektuar ato tek mbarë njerëzimi.

Bamirësia dhe mbështetja për nevojtarët janë pjesë e qenësishme e karakterit të popullit tonë, por ishte Nënë Tereza ajo që i transmetoi këto vlera përtej çdo kufiri, duke i kthyer në pasuri të njerëzimit mbarë, dhe duke u shpërblyer me çmimin Nobel për Paqe! Nderim i përjetshëm për Nënën tonë Terezë, që nderoi gruan shqiptare dhe kombin mbarë“, ka thënë kryetari Basha.