Banorët e Koliqit protestojnë sot për shkak të ndërprerjeve të shpeshta të rrymës

Banorët e fshatit Koliq, në Komunën e Prishtinës, kanë paralajmëruar se sot, duke filluar nga ora 14:00, do të organizojnë një protestë për shkak të ndërprerjeve të shpeshta të energjisë elektrike, të cilat po u shkaktojnë vështirësi të vazhdueshme në jetën e përditshme.

Protesta do të jetë paqësore dhe do të mbahet pranë trafos së fshatit, si një formë simbolike për të shprehur pakënaqësinë e qytetarëve ndaj gjendjes aktuale me furnizimin me energji elektrike.

Banorët thonë se ndërprerjet janë bërë të shpeshta dhe të gjata, duke ndikuar negativisht në aktivitetet familjare, bujqësore dhe ekonomike të zonës.

Sipas tyre, pavarësisht ankesave të përsëritura drejtuar institucioneve përkatëse, problemi ende nuk ka gjetur zgjidhje.

Përmes kësaj proteste, banorët kërkojnë reagim urgjent nga autoritetet kompetente dhe ndërmarrjen e masave konkrete për një furnizim të qëndrueshëm dhe të rregullt me energji elektrike.