Zëdhënësja e Qeverisë së Maqedonisë së Veriut, Venera Azizi, së bashku me deputetet e Kuvendit, ka marrë pjesë në një takim me Ministren për Evropë dhe Punë të Jashtme të Republikës së Shqipërisë, Elisa Spiropali si dhe me Ambasadorin e Shqipërisë në Shkup, Denion Meidani.
Në qendër të diskutimeve ishte roli i grave në politikë dhe në proceset e vendimmarrjes, i vlerësuar si element thelbësor për forcimin e demokracisë, rritjen e përfaqësimit institucional dhe avancimin e proceseve integruese evropiane.
Zëdhënësja Azizi theksoi se fuqizimi i grave në të gjitha nivelet e institucioneve shtetërore mbetet prioritet i Qeverisë, duke e cilësuar atë si një parakusht të rëndësishëm për ndërtimin e institucioneve funksionale, transparente dhe gjithëpërfshirëse.
Sipas zëdhënëses Venera Azizi, ky takim është një hap i rëndësishëm drejt thellimit të bashkëpunimit ndërinstitucional dhe shkëmbimit të përvojave mes dy vendeve, veçanërisht në fushën e barazisë gjinore dhe integrimeve evropiane.
