Botuesi i SHB Shkupi, Azam Dauti, ka bërë thirrje për pjesëmarrje masive në protestat e studentëve shqiptarë që do të zhvillohen me 6 prill të hënën në Shkup, duke filluar nga ora 12:30, nga Ura e Gurit.
Dauti thekson se Maqedonia e Veriut është toka dhe prona e qytetarëve, dhe nuk mund të lejohet që ajo të kthehet në mjet politik i një partie që sipas tij, ka synuar të ngulfatë çdo aspekt të jetës shqiptare, nga ekonomia e arsimi te shëndetësia, kultura dhe sporti.
Sipas botuesit Azam Dauti, mbështetja e protestës studentore është një detyrim moral dhe qytetar, duke theksuar se studentët mbrojnë gjuhën, kulturën dhe identitetin kombëtar, ndërkaq heshtja e politikës shqiptare dhe ndërkombëtare nuk është neutralitet, por bashkëfajësi.
Më poshtë shkrimi i plotë nga botuesi Azam Dauti:
TË HËNËN, NGA ORA 12:30,
TË GJITHA RRUGËT ÇOJNË TE PROTESTA E STUDENTËVE SHQIPTARË NGA URA E GURIT NË SHKUP!
Maqedonia është toka jonë. Prona jonë. Mundi jonë. Nuk mund të lejojmë që ajo që është e përbashkëta jonë të kthehet në pronë të një partie që ka bërë strategji politike për të ngulfatë çdo aspekt të jetës shqiptare: ekonomi, arsim, shëndetësi, kulturë, sport, mbrojtje, siguri… madje edhe ajrin e hapësirave shqiptare.
Është e rrezikshme dhe e papranueshme që VMRO-DPMNE-ja të vazhdojë të imponojë një nënshtrim sistematik ndaj shqiptarëve. Çdo heshtje, çdo mosreagim i politikës shqiptare dhe ndërkombëtare nuk është neutralitet, është bashkëfajësi.
Si qytetar, e shoh mbështetjen ndaj protestës së studentëve shqiptarë si një detyrim moral dhe qytetar. Ata mbrojnë gjuhën, kulturën dhe trungun tonë kombëtar, për të cilin kemi dhënë mund e djersë.
Unë do të jem aty.
Studentët e mi (që u ligjëroja “Etikën…” në UNT) dhe të gjithë ata që duan të mbrojnë dinjitetin, të drejtën dhe autonominë tonë duhet të jenë aty. Nuk ka më vend për indiferencë. Ky është momenti për vendosmëri, guxim dhe përgjegjësi intelektuale.
VMRO-DPMNE-ja duhet të kuptojë: nuk mund të ngulfat asgjë që është e jona.
Politika shqiptare dhe ndërkombëtare duhet të reagojnë, përndryshe bëhen përgjegjëse për pasojat e nënshtrimit tonë!
Burimi: lajmpress.org
